തലപ്പുഴ: എസ്.എസ്.എല്‍.സി പരീക്ഷ ഹാള്‍ടിക്കറ്റ് വാങ്ങി മടങ്ങവേ തലപ്പുഴ മാര്‍ക്കറ്റിന് സമീപമുള്ള പുഴയില്‍ കൂട്ടുകാരോടൊപ്പം കുളിക്കാനിറങ്ങിയ 2 വിദ്യാര്‍ത്ഥികള്‍ മുങ്ങി മരിച്ചു. തലപ്പുഴ ഹയര്‍ സെക്കന്ററി സ്‌കൂളിലെ പത്താം ക്ലാസ്സ് വിദ്യാര്‍ത്ഥികളാണ് മുങ്ങി മരിച്ചത്. കണ്ണോത്ത്മല കൈതകാട്ടില്‍ സദാനന്ദന്‍ ഉദയ -ദമ്പതികളുടെ മകന്‍ ആനന്ദ് (15) , തലപ്പുഴ കമ്പിപ്പാലം നല്ലകണ്ടി വീട്ടില്‍ മുജീബിന്റെ മകന്‍ മുബസില്‍ (15) എന്നിവരാണ് മരിച്ചത്.
ഇന്നലെ ഉച്ചക്ക് 2.45 ഓടെയാണ് സംഭവം. എസ്.എസ്.എല്‍.സി പരീക്ഷക്ക് മുന്നോടിയായി സ്‌കൂളില്‍ നിന്നും പരീക്ഷ ഹാള്‍ടിക്കറ്റ് വാങ്ങി മടങ്ങവേ 10 ഓളം കൂട്ടുകാരോടൊപ്പമാണ് ഇരുവരും പുഴയില്‍ കുളിക്കാനിറങ്ങിയത്. തുടര്‍ന്ന് ഇരുവരും പുഴയില്‍ മുങ്ങുകയായിരുന്നു. കൂട്ടുകാര്‍ വിവരമറിയിച്ചതിനെ തുടര്‍ന്ന് നാട്ടുകാരും ഫയര്‍ഫോഴ്‌സും, വാളാട് റെസ്‌ക്യു ടീം അംഗങ്ങളും തിരച്ചില്‍ നടത്തുകയും ഫയര്‍ഫോഴ്‌സ് അംഗങ്ങള്‍ മൃതദേഹങ്ങള്‍ കണ്ടെത്തുകയും ചെയ്തു.
ഇരുവരുടേയും മൃതദേഹങ്ങള്‍ മാനന്തവാടി മെഡിക്കല്‍ കോളേജ് മോര്‍ച്ചറിയില്‍ സൂക്ഷിച്ചിരിക്കുകയാണ്.
Tags:
OBITUARY
