വേരുകൾ തേടി പാറക്കണ്ടി കുടുംബം ഒന്നിക്കുന്നു; രണ്ടാം കുടുംബസംഗമം ഏപ്രിൽ 14ന്.

കൊടുവള്ളി : ഏഴ് തലമുറകളുടെ സ്നേഹബന്ധങ്ങൾ പുതുക്കി പാറക്കണ്ടി കുടുംബത്തിൻ്റെ രണ്ടാമത് മഹാസംഗമം 'പാറക്കണ്ടി കുടുംബസംഗമം-2' ഏപ്രിൽ 14 ചൊവ്വാഴ്ച കൈതപ്പൊയിൽ നോളേജ് സിറ്റി  'വല്ലൻസിയ ഗാലേറിയ' ഓഡിറ്റോറിയത്തിൽ വെച്ച് നടക്കും. 

പത്തൊമ്പതാം നൂറ്റാണ്ടിന്റെ മധ്യത്തിൽ മക്കടയിൽ നിന്നും കിഴക്കോത്ത് വില്ലേജിലെ കത്തറമ്മൽ പ്രദേശത്ത് കുടിയേറി കുടുംബ മഹിമ പടുത്തുയർത്തിയ നാരങ്ങാളി അവറാൻ എന്നവരുടെയും ഇമ്പിച്ചിപ്പാത്തുവിന്റെയും പിൻമുറക്കാരാണ് ഈ സംഗമത്തിൽ ഒത്തുചേരുന്നത്.

​രാവിലെ 8.30-ന് രജിസ്ട്രേഷനോട് കൂടി പരിപാടികൾ ആരംഭിക്കും. 9.30-ന് നടക്കുന്ന ഉദ്ഘാടന സമ്മേളനത്തിൽ പാറക്കണ്ടി ഫാമിലി ട്രസ്റ്റ് പ്രസിഡണ്ട് പി.പി. മൊയ്തീൻ മാസ്റ്റർ സംഗമം ഉദ്ഘാടനം ചെയ്യും. സ്വാഗതസംഘം ചെയർമാൻ ടി.പി. അബുഹാജി അധ്യക്ഷത വഹിക്കുന്ന ചടങ്ങിൽ ജനറൽ കൺവീനർ ടി.പി. മുഹമ്മദ് സ്വാഗതം ആശംസിക്കും.

​ബാവ ജീറാനി, കെ.പി. സക്കീർ ഹുസ്സയിൻ, എ.സി. ഗഫൂർ, നസീർ ബാവ, ഗഫൂർ ഫൈസി, പി.പി. അബ്ദുള്ള, ഹാരിസ് കൽത്തറ എന്നിവർ ആശംസകൾ അർപ്പിച്ചു സംസാരിക്കും. പി.കെ. അബ്ദുറഹിമാൻകുട്ടി നന്ദി രേഖപ്പെടുത്തും.

​കുടുംബത്തിലെ നാലായിരത്തോളം അംഗങ്ങളിൽ നിന്നും തിരഞ്ഞെടുക്കപ്പെട്ട മൂവായിരത്തോളം പ്രതിനിധികളാണ് സംഗമത്തിൽ പങ്കെടുക്കുന്നത്. അയമ്മദ്, ഇമ്പിച്ചിക്കോയ എന്നിവരുടെ 12 മക്കളുടെ സന്താന പരമ്പരകളാണ് സംഗമത്തിന് ആവേശം പകരുന്നത്.

​ഉദ്ഘാടന സമ്മേളനത്തിന് ശേഷം കുട്ടികളുടെ വിവിധങ്ങളായ കലാപരിപാടികൾ, പ്രമുഖർ നയിക്കുന്ന മോട്ടിവേഷൻ ക്ലാസ് എന്നിവ നടക്കും. കുടുംബത്തിലെ മുതിർന്ന അംഗങ്ങളെയും വിവിധ മേഖലകളിൽ മികച്ച നേട്ടങ്ങൾ കൈവരിച്ച പ്രതിഭകളെയും ചടങ്ങിൽ ആദരിക്കും.