വീട്ടിനകത്തായാൽ പോരാ:അടച്ചിരിക്കേണ്ടത് മുറിയില്‍

പേര്​ ഹോം ക്വാറന്റയിന്‍ എന്നാണെങ്കിലും റൂം ക്വാറന്റയിന്‍ ആണെന്ന്​  പലര്‍ക്കും അറിയില്ല. വിദേശത്തനിന്നും എത്തുന്നത്​ ഒരാളാണെങ്കില്‍ അവരുടെ വീട്ടുകാരും ഇയാളില്‍ നിന്നും അകലം പാലിക്കാന്‍ ശ്രദ്ധിക്കണം. ഒരു പക്ഷേ ഇവരില്‍ രോഗം കടന്നുകൂടിയിട്ടുണ്ടെങ്കില്‍ അത്​ വീട്ടുകാരിലേക്ക്​ കൂടി പകരുന്നത്​ ഇതുവഴി ഒഴിവാക്കാം.അതിനായി വീട്ടുനിരീക്ഷണത്തല്‍ ശ്രദ്ധിക്കേണ്ട കുറച്ച്‌​ കാര്യങ്ങളുണ്ട്​. വീട്ടുനിരീക്ഷണം എന്താണെന്നും അതില്‍ ശ്രദ്ധിക്കേണ്ട കാര്യങ്ങള്‍ എന്തെല്ലാമാണെന്നും ​ നോക്കാം.

1. നിരീക്ഷണത്തിലുള്ളവര്‍ അവരുടെ മുറിയില്‍ തന്നെ കഴിയണം. മാസ്​ക്​ ധരിക്കണം. അവരുപയോഗിക്കുന്ന സോപ്പ്​, തോര്‍ത്ത്​, ഗ്ലാസ്​, പാത്രങ്ങള്‍, കിടക്ക തുടങ്ങിയ വസ്​തുക്കള്‍ മറ്റുള്ളവരുമായി പങ്കുവെക്കരുത്​.
 
2. കുടുംബത്തിലെ മറ്റംഗങ്ങളുമായി കുറഞ്ഞത്​ ഒരു മീറ്റര്‍ എങ്കിലും അകലം പാലിക്കാന്‍ ശ്രദ്ധിക്കണം. 

3. ആവശ്യത്തിന്​ വായു സഞ്ചാരമുള്ള മുറി തിരഞ്ഞെടുക്കണം. 

4. നിരീക്ഷണത്തിലുള്ളവരെ കഴിവതും ഒരാള്‍ തന്നെ പരിചരിക്കാന്‍ ശ്രമിക്കണം. ഇവരെ ശുശ്രൂഷിക്കു​ന്നവര്‍ മാസ്​ക്​, കയ്യുറ എന്നിവ ധരിക്കണം.
 
5. നിരീക്ഷണത്തിലുള്ളവരെ പരിചരിക്കുന്നതിന്​ മുമ്ബും ശേഷവും ആല്‍ക്കഹോള്‍ അടങ്ങിയ സാനിറ്റൈസര്‍ അല്ലെങ്കില്‍ സോപ്പും വെള്ളവും കൊണ്ട്​ കൈകള്‍ ശുചിയാക്കണം.
 
6. വസ്​ത്രങ്ങള്‍, കിടക്കവിരി, ടവല്‍ എന്നിവ ഉപയോഗശേഷം റൂമില്‍ തയാറാക്കി വെക്കുന്ന ബ്ലീച്ചിങ്​ ലായനിയില്‍ നിക്ഷേപിക്കണം. ഇവ അലക്കി ഉണങ്ങിയതിന്​ ശേഷം മാത്രം ഉപയോഗിക്കുക.
 
7. രോഗിക്ക്​ വേണ്ട ഭക്ഷണം മുറിയില്‍ എത്തിച്ച്‌​ നല്‍കണം.മറ്റുള്ളവരോടൊപ്പം ഭക്ഷണം കഴിക്കാന്‍ ഇരിക്കരുത്​.
 
8. കടുത്ത ചുമയോ വയറിളക്കമോ ഉള്ള രോഗിയാണെങ്കില്‍ കൈയുറ കൂടി ധരിക്കാന്‍ സാധിച്ചാല്‍ നല്ലത്​. ഉപയോഗിച്ചശേഷം കൈയുറ ബ്ലീച്ചിങ്​ പൗഡര്‍ ലായനിയില്‍ നിക്ഷേപിക്കണം.