പൂനൂർ: കെ.എൻ.എം പൂനൂർ യൂണിറ്റിന്റെ ആഭിമുഖ്യത്തിൽ പൂനൂർ മുബാറക് ഗ്രൗണ്ടിൽ സംഘടിപ്പിച്ച ചെറിയപെരുന്നാൾ നമസ്കാരം ഭക്തിനിർഭരമായി നടന്നു. പ്രദേശത്തിന്റെ വിവിധ ഭാഗങ്ങളിൽ നിന്നായി സ്ത്രീകളും കുട്ടികളുമടക്കം നൂറുകണക്കിന് വിശ്വാസികളാണ് ഈദ് ഗാഹിൽ പങ്കെടുത്തത്.
നൗഷാദ് കരുവണ്ണൂർ പെരുന്നാൾ നമസ്കാരത്തിന് നേതൃത്വം നൽകുകയും ഈദ് സന്ദേശം നൽകുകയും ചെയ്തു. സ്നേഹത്തിന്റെയും പങ്കുവെക്കലിന്റെയും മഹത്തായ സന്ദേശമാണ് പെരുന്നാൾ നൽകുന്നതെന്ന് അദ്ദേഹം ഓർമ്മിപ്പിച്ചു.
രാജ്യത്ത് നിലനിൽക്കുന്ന സാഹോദര്യവും മതസൗഹാർദ്ദവും വീണ്ടെടുക്കാൻ ഓരോ പൗരനും പ്രത്യേകം പരിശ്രമിക്കണമെന്ന് അദ്ദേഹം ആഹ്വാനം ചെയ്തു. മനുഷ്യർക്കിടയിൽ വിള്ളലുകൾ വീഴ്ത്തുന്ന പ്രവണതകളെ സ്നേഹം കൊണ്ട് പ്രതിരോധിക്കണമെന്നും അദ്ദേഹം ഓർമിപ്പിച്ചു.
യുദ്ധം തകർത്തുകൊണ്ടിരിക്കുന്ന പശ്ചിമേഷ്യയിൽ എത്രയും പെട്ടെന്ന് സമാധാനം പുലരണമെന്നും, അവിടെയുള്ള ജനങ്ങളുടെ ദുരിതമകറ്റാൻ ലോകരാജ്യങ്ങളുടെ ഭാഗത്തുനിന്ന് ഫലപ്രദമായ നടപടികൾ ഉണ്ടാകണമെന്നും അദ്ദേഹം ഈദ് പ്രസംഗത്തിൽ ഉണർത്തി.
നമസ്കാരത്തിന് ശേഷം വിശ്വാസികൾ പരസ്പരം ഈദ് ആശംസകൾ കൈമാറിയാണ് പിരിഞ്ഞുപോയത്. യൂണിറ്റ് KNM ഭാരവാഹികൾ ഈദ് ഗാഹിന് ആവശ്യമായ ക്രമീകരണങ്ങൾ ഒരുക്കിയിരുന്നു.
Tags:
POONOOR