ദുബൈ യാത്രക്കാർ 48 മണിക്കൂറിനുള്ളിൽ നടത്തിയ കോവിഡ് പരിശോധന ഫലം കരുതണം

ദുബൈ: ഇന്ത്യയിൽ നിന്ന്​ ദുബൈയിലേക്ക്​ വരുന്ന വിമാന യാത്രികർ 48 മണിക്കൂറിനുള്ളിൽ നടത്തിയ കോവിഡ്​ നെഗറ്റീവ്​ പരിശോധന ഫലം ഹാജരാക്കണമെന്ന്​ വിവിധ എയർലൈനുകൾ അറിയിച്ചു. ഏപ്രിൽ 22 മുതലാണ്​ ഇത്​ പ്രാബല്യത്തിൽ വരുന്നത്​.

നേരത്തെ 72 മണിക്കൂറിനുള്ളിൽ നടത്തിയ പരിശോധന ഫലമായിരുന്നു വേണ്ടിയിരുന്നത്​. ഇനി മുതൽ പരിശോധനക്കായി സാമ്പിൾ എടുത്തത്​ മുതലുള്ള 48 മണിക്കൂറാണ്​ കണക്കാക്കുന്നത്​ (ഫലം വന്ന ശേഷമുള്ള 48 മണിക്കൂറല്ല).

ടെസ്​റ്റ്​ ചെയ്​ത സമയം റിപ്പോർട്ടിൽ കൃത്യമായി രേഖപ്പെടുത്തിയിരിക്കണം. ഒറിജിനൽ റിപ്പോർട്ടിലേക്ക്​ ലിങ്കുള്ള ക്യൂ ആർ കോഡ്​ റിപ്പോർട്ടിലുണ്ടായിരിക്കണമെന്ന്​ എയർ ഇന്ത്യ എക്​സ്​പ്രസ്​ അധികൃതർ അറിയിച്ചു.

പരിശോധന ഫലം ഇംഗ്ലീഷിലോ അറബിയിലോ രേഖപ്പെടുത്തിയിരിക്കണം.