കൂടത്തായി പാലത്തിൽ വിള്ളൽ; അധികൃതർ കണ്ണടയ്ക്കുന്നുവെന്ന് ആക്ഷേപം.

താമരശ്ശേരി: സംസ്ഥാന പാതയിലെ കൂടത്തായി പാലം അപകട ഭീഷണിയിൽ. പാലത്തിന്റെ തൂണിൽ വലിയ വിള്ളൽ വീണതും ടാറിങ് പൊളിഞ്ഞതും അധികൃതർ കണ്ടില്ലെന്ന് നടിക്കുകയാണെന്ന് ആക്ഷേപം ഉയർന്നിട്ടുണ്ട്. 1972 ൽ മലബാർ കൺസ്ട്രക്ഷൻസ് കമ്പനിയാണ് പാലം നിർമ്മിച്ചത്. ദിവസവും നൂറുകണക്കിന് വാഹനങ്ങളാണ് പാലത്തിലൂടെ കടന്നു പോകുന്നത്.

50 വർഷത്തിലധികം പഴക്കമുള്ള പാലത്തിന് ബലക്ഷയം സംഭവിച്ചത് നാട്ടുകാർ അധികൃതരുടെ ശ്രദ്ധയിൽപ്പെടുത്തിയതാണ്. എന്നാൽ അധികൃതരുടെ ഭാഗത്തുനിന്ന് കാര്യമായ ഇടപെടലുകൾ ഉണ്ടായില്ല. ഈയിടെ 228 കോടി രൂപ ചെലവഴിച്ച് കൊയിലാണ്ടി - എടവണ്ണ സംസ്ഥാന പാത നവീകരിച്ചപ്പോൾ കൂടത്തായ് പാലത്തിന്റെ അപകടാവസ്ഥ പരിഹരിക്കുമെന്ന് അധികൃതർ പറഞ്ഞിരുന്നെങ്കിലും നടപടിയുണ്ടായില്ല.

സംസ്ഥാന പാതയിൽ അശാസ്ത്രീയ ടാറിങ് മൂലം പലയിടത്തും വലിയ കുഴികൾ രൂപപ്പെട്ടിട്ടുണ്ട്. അതുകൊണ്ട് അപകടങ്ങളും പതിവാണ്. കൂടത്തായി ഭാഗത്ത് കഴിഞ്ഞ ദിവസം ഇരുചക്ര വാഹനം നിയന്ത്രണംവിട്ട് എതിരെ വന്ന വാഹനത്തിലിടിച്ച് ഒരാൾ മരിച്ചിരുന്നു. പാലത്തിൽ ഭാരവാഹനങ്ങൾക്ക് നിയന്ത്രണമുണ്ടെന്ന് ബോർഡ് വെച്ചു എന്നല്ലാതെ മറ്റു നിയന്ത്രണങ്ങളൊന്നും ഏർപ്പെടുത്തിയിട്ടില്ല.