തിരുവനന്തപുരം:സംസ്ഥാനത്തെ സ്‌കൂള്‍ ഉച്ചഭക്ഷണ മെനുവില്‍ മാറ്റം വരുത്തി വിദ്യാഭ്യാസ വകുപ്പ്.ആഴ്ചയില്‍ ഒരു ദിവസം വെജിറ്റബിള്‍ ഫ്രൈഡ്റൈസ്,ലെമണ്‍ റൈസ്,വെജ് ബിരിയാണി എന്നീ വിഭവങ്ങള്‍ തയ്യാറാക്കാൻ നിർദേശം നല്‍കിയതായി വിദ്യാഭ്യാസ മന്ത്രി വി.ശിവൻകുട്ടി.ഇന്ന് പുറപ്പെടുവിച്ച പത്രക്കുറിപ്പിലാണ് മന്ത്രി ഇക്കാര്യം വിശദമാക്കിയത്.
സംസ്ഥാനത്തെ സ്‌കൂള്‍ ഉച്ചഭക്ഷണ മെനു ശാസ്ത്രീയമായി പരിശോധിക്കുന്നതിനും പരിഷ്‌കരിക്കുന്നതിനും നിയോഗിച്ച വിദഗ്ധ സമിതി തയ്യാറാക്കിയ റിപ്പോർട്ട് പ്രകാരമാണ് മെനു പരിഷ്‌ക്കരിക്കുന്നത്. ഇതിന്റെ ഭാഗമായി നിലവിലുള്ള മെനു പ്ലാനിങ്ങില്‍ മാറ്റം വരുത്തുമ്പോള്‍ ഒരു ദിവസത്തെ കറികളില്‍ ഉപയോഗിക്കുന്ന പച്ചക്കറിക്ക് പകരമായി മറ്റ് പച്ചക്കറികള്‍ നല്‍കേണ്ടതാണെന്ന് കുറിപ്പില്‍ പറയുന്നു.
വെറും ഇലക്കറി വർഗ്ഗങ്ങള്‍ കറികളായി നല്‍കുകയാണെങ്കില്‍ അവയില്‍ പയർ അല്ലെങ്കില്‍ പരിപ്പ് വർഗ്ഗങ്ങള്‍ ചേർക്കണം.ആഴ്ചയില്‍ ഒരു ദിവസം ഫോർട്ടിഫൈഡ് അരി വച്ച്‌ വിവിധയിനം ചോറിന്റെ (വെജിറ്റബിള്‍ ഫ്രൈഡ് റൈസ്, ലെമണ്‍ റൈസ്, വെജ് ബിരിയാണി) വിഭവങ്ങള്‍ തയ്യാറാക്കാൻ നിർദേശം നല്‍കിയിട്ടുണ്ട്.ഇവയോടൊപ്പം എന്തെങ്കിലും വെജിറ്റബിള്‍ കറികള്‍ (കൂട്ടുകറി,കുറുമ) നല്‍കണം.കൂടാതെ പുതിന,ഇഞ്ചി, നെല്ലിക്ക,പച്ചമാങ്ങ എന്നിവ ചേർത്ത് തയ്യാറാക്കുന്ന ചമ്മന്തി കൊടുക്കുന്ന കാര്യവും പരിഗണിച്ചിട്ടുണ്ടെന്ന് വിദ്യാഭ്യാസ മന്ത്രി പറഞ്ഞു.
ചെറുധാന്യങ്ങളുടെ ഗുണങ്ങള്‍ മനസ്സിലാക്കി കുട്ടികള്‍ക്ക് ആഴ്ചയില്‍ റാഗി ഉപയോഗിച്ച്‌ മിതമായ അളവില്‍ ശർക്കരയും തേങ്ങയും ചേർത്ത റാഗി കൊഴുക്കട്ട, ഇലയട,അവില്‍ കുതിർത്തത്,പാല്‍ ഉപയോഗിച്ച്‌ ക്യാരറ്റ് പായസം,റാഗി പായസം എന്നീ വ്യത്യസ്ത വിഭവങ്ങള്‍ മെനുവില്‍ ഉള്‍പ്പെടുത്തിയിട്ടുണ്ടെന്നും മന്ത്രി പറഞ്ഞു.
സ്‌കൂളില്‍ നല്‍കേണ്ട ഭക്ഷണ വിഭവങ്ങള്‍ (ദിവസം അടിസ്ഥാനമാക്കി)
ചോറ്,കാബേജ് തോരൻ,സാമ്പാർ
ചോറ്,പരിപ്പ് കറി, ചീരത്തോരൻ
ചോറ്,കടല മസാല, കോവക്ക തോരൻ
ചോറ്,ഓലൻ,ഏത്തക്ക തോരൻ
ചോറ്,സോയ കറി, കാരറ്റ് തോരൻ
ചോറ്,വെജിറ്റബിള്‍ കുറുമ,ബീറ്റ്റൂട്ട് തോരൻ
ചോറ്,തീയല്‍, ചെറുപയർ തോരൻ
ചോറ്,എരിശ്ശേരി, മുതിര തോരൻ
ചോറ്, പരിപ്പ് കറി, മുരിങ്ങയില തോരൻ
ചോറ്, സാമ്പാർ, മുട്ട അവിയല്‍
ചോറ്, പൈനാപ്പിള്‍ പുളിശ്ശേരി, കൂട്ടുകറി
ചോറ്, പനീർ കറി, ബീൻസ് തോരൻ
ചോറ്, ചക്കക്കുരു പുഴുക്ക്, അമരക്ക തോരൻ
ചോറ്, വെള്ളരിക്ക പച്ചടി, വൻപയർ തോരൻ
ചോറ്,വെണ്ടക്ക മപ്പാസ്,കടല മസാല
ചോറ്,തേങ്ങാചമ്മന്തി, വെജിറ്റബിള്‍ കുറുമ
ചോറ്/എഗ്ഗ് ഫ്രൈഡ് റൈസ്,വെജിറ്റബിള്‍ മോളി
ചോറ്/കാരറ്റ് റൈസ്, കുരുമുളക് മുട്ട റോസ്റ്റ്
ചോറ്,പരിപ്പ് കുറുമ, അവിയല്‍
ചോറ്/ലെമണ്‍ റൈസ്, കടല മസാല
Tags:
EDUCATION