എം.ബി.ബി.എസ്, ബിഡിഎസ് കോഴ്സുകളില്‍ പ്രവേശനത്തിന് ദേശീയതലത്തില്‍ നടത്തുന്ന നീറ്റ്പരീക്ഷക്കു അപേക്ഷ ക്ഷണിച്ചു.
രാജ്യത്ത് വിവിധ സര്‍ക്കാര്‍, സ്വകാര്യ മെഡിക്കല്‍ കോളെജുകള്‍ നല്‍കുന്ന മെഡിക്കല്‍, ഡെന്റല്‍ യുജി കോഴ്സുകളില്‍ പ്രവേശനത്തിന് മാത്രമാണ് പ്രവേശന പരീക്ഷ. എല്ലാ മെഡിക്കല്‍ സ്ഥാപനങ്ങള്‍ക്കും എംബിബിഎസ് / ബിഡിഎസ് കോഴ്സുകളില്‍ പ്രവേശനം നല്‍കുന്നതിനുള്ള നീറ്റ് സ്‌കോര്‍ പരിഗണിക്കുന്നു.
www.cbseneet.nic.in വെബ്സൈറ്റിലൂടെ ഓണ്‍ലൈനായി മാര്‍ച്ച് ഒമ്പതുവരെ അപേക്ഷിക്കാം. 2018 മെയ് ആറിനാണ് പരീക്ഷ. കേരളത്തില്‍ ആലപ്പുഴ, എറണാകുളം, കണ്ണൂര്‍, കൊല്ലം, കോട്ടയം, കോഴിക്കോട്, മലപ്പുറം, തൃശൂര്‍, പാലക്കാട്, തിരുവനന്തപുരം എന്നിവിടങ്ങളിലും ലക്ഷദ്വീപില്‍ കവറത്തിയലും പരീക്ഷാകേന്ദ്രമുണ്ട്.
അഖിലേന്ത്യാ ക്വോട്ട, സംസ്ഥാന സര്‍ക്കാര്‍ ക്വോട്ട, സ്വകാര്യ/ഡീംഡ് സര്‍വകലാശാലകളിലെ സംസ്ഥാന/മാനേജ്മെന്റ്/എന്‍ആര്‍ഐ ക്വോട്ട സീറ്റുകള്‍ എന്നിവയിലെ എംബിബിഎസ്, ബിഡിഎസ് പ്രവേശനം നീറ്റ് സ്‌കോറിന്റെ അടിസ്ഥാനത്തിലാണ്.
ഫിസിക്സ്, കെമിസ്ട്രി, ബയോളജി/ബയോ ടെക്നോളജി പഠിച്ച് പ്ലസ്ടു/തത്തുല്യപരീക്ഷ പാസാകുകയും പ്ലസ്ടു/തത്തുല്യപരീക്ഷയില്‍ ഫിസിക്സ്, കെമിസ്ട്രി, ബയോളജി/ബയോടെക്നോളജി, ഇംഗ്ലീഷ് എന്നിവ പ്രത്യേകം പാസാകുകയും ഫിസിക്സ്, കെമിസ്ട്രി, ബയോളജി/ബയോ ടെക്നോളജിക്ക് മൊത്തം കുറഞ്ഞത് 50 ശതമാനം മാര്‍ക്കെങ്കിലും നേടുകയും ചെയ്തവര്‍ക്ക് അപേക്ഷിക്കാം. ഇപ്പോള്‍ പ്ലസ്ടു/തത്തുല്യ പരീക്ഷയ്ക്ക് പഠിക്കുന്നവര്‍ക്കും അപേക്ഷിക്കാം. അവര്‍ എംബിബിഎസ്/ബിഡിഎസ് പ്രവേശനസമയത്ത് നിശ്ചിതയോഗ്യത നേടണം. എസ്സി/എസ്ടിക്കും ഒബിസിക്കും 40 ശതമാനം മാര്‍ക്ക്. ഭിന്നശേഷിവിഭാഗത്തിന് 45 ശതമാനം മാര്‍ക്ക്. എസ്സി/എസ്ടിക്കാരായ ഭിന്നശേഷിവിഭാഗത്തിന് 40 ശതമാനം മാര്‍ക്ക്.
റഗുലറായി പ്ലസ്ടു പാസായവരായിരിക്കണം. ഓപണ്‍ സ്‌കൂള്‍ വഴിയോ പ്രൈവറ്റായോ പ്ലസ്ടു പാസായവര്‍ക്ക് അപേക്ഷിക്കാനാവില്ല.
പതിനേഴു വയസ്സ് തികഞ്ഞവരോ എംബിബിഎസ്/ബിഡിഎസ് കോഴ്സിന് ചേരുന്നവര്‍ഷം ഡിസംബര്‍ 31ന് 17 വയസ്സ് തികയുന്നവരോ ആകണം അപേക്ഷകര്‍. 25 വയസ്സാണ് ഉയര്‍ന്ന പ്രായപരിധി. ജനറല്‍വിഭാഗത്തിലുള്ളവര്‍ 1993 മെയ് ഏഴിനും 2002 ജനുവരി ഒന്നിനും ഇടയില്‍ ജനിച്ചവരാകണം. എസ്സി/എസ്ടി/ഒബിസി/ഭിന്നശേഷി വിഭാഗത്തിലുള്ളവര്‍ 1988 മെയ് ഏഴിനും 2002 ജനുവരി ഒന്നിനും ഇടയില്‍ ജനിച്ചവരാകണം. (രണ്ടു തീയതിയും ഉള്‍പ്പെടെ).
- അപേക്ഷിക്കുന്നതിന് ആധാര്‍കാര്‍ഡ് വേണം.
- അപേക്ഷാഫീസ് 1400 രൂപ.
- എസ്സി/എസ്ടിക്കും ഭിന്നശേഷിവിഭാഗത്തിനും 750 രൂപ.
- ഫീസ് ഡെബിറ്റ്/ക്രെഡിറ്റ് കാര്‍ഡുകളിലൂടെയോ നെറ്റ് ബാങ്കിങ്ങിലൂടെയോ ഇവാലറ്റുകളിലൂടെയോ അടയ്ക്കാം.
ഓണ്‍ലൈനായി അപേക്ഷിക്കുന്നതിന് www.cbseneet.nic.in വെബ്സൈറ്റ് കാണുക. ഓണ്‍ലൈന്‍ അപേക്ഷ പൂരിപ്പിക്കുന്നതിനെക്കുറിച്ചും ഫീസ് അടയ്ക്കുന്നതിനെക്കുറിച്ചും വിശദമായി വിജ്ഞാപനത്തിലുണ്ട്. ഇന്‍ഫര്‍മേഷന്‍ ബുള്ളറ്റിന്‍ ഡൗണ്‍ലോഡ്ചെയ്ത് വായിച്ചശേഷം ഓണ്‍ലൈന്‍ അപേക്ഷ പൂരിപ്പിക്കുക.
Tags:
EDUCATION