സംസ്ഥാന ഹജ്ജ് കമ്മറ്റി അംഗവും സമസ്ത കേന്ദ്ര മുശാവറ അംഗവുമായ ടി.എസ്. ഇബ്രാഹീം കുട്ടി മുസ്ല്യാർ അന്തരിച്ചു.

കണ്ണൂർ: പ്രമുഖ ഇസ്ലാമിക മത പണ്ഡിതനും സമസ്ത കേന്ദ്ര മുശാവറ അംഗവും, സംസ്ഥാന ഹജ്ജ് കമ്മറ്റി അംഗവുമായ തലശ്ശേരി ചൊക്ലി ടി.എസ് ഇബ്രാഹീം കുട്ടി മുസ്ല്യാർ (88) അന്തരിച്ചു. വാർദ്ധക്യ സഹജമായ അസുഖത്തെ തുടര്‍ന്ന് ഉണ്ണികുളം എകരൂൽ പൂക്കോയ തങ്ങൾ ഹോസ്പിസിൽ ചികിത്സയിലിരിക്കെ ഇന്ന്‌ പുലര്‍ച്ചെ നാലോടെയായിരുന്നു അന്ത്യം. 

തലശ്ശേരി, മാഹി, പാനൂർ, ചൊക്ലി, കോട്ടക്കല്‍, നിട്ടൂര്‍, അഴിയൂർ തുടങ്ങി 30 ഓളം മഹല്ലുകളുടെ ഖാസിയായിരുന്നു. മങ്ങാട് മഹല്ല് പ്രസിഡൻ്റായും, ഖുതുബി ചാരിറ്റബിൾ ട്രസ്റ്റ് ചെയർമാനായും പ്രവർത്തിച്ചു വരികയായിരുന്നു.

1937- ലാണ് ജനനം. കാസര്‍ക്കോട്ടെ പരേതരായ തളങ്കര മുഹമ്മദ് സഈദ് മുസലിയാരുടെയും ഫാത്തിമയുടെയും മകനാണ്. സൂഫീവര്യനുമായിരുന്ന ശംസുൽ ഉലമ ഖുതുബി മുഹമ്മദ് മുസ്ല്യാരുടെ പൗത്രനാണ്. ഗുരുവും പിതാവുമായ മുഹമ്മദ് സഈദ് മുസ്ലിയാരിൽ നിന്നും, പിന്നീട് പെരിങ്ങത്തൂരിൽ നിന്നും ദര്‍സ് പഠനം, കല്ലറക്കൽ ദര്‍സ് പ്രാഥമിക പഠനത്തിന് ശേഷം പട്ടിക്കാട്‌ ജാമിഅ നൂരിയ്യ അറബിയ്യയില്‍ നിന്നും ഉപരിപഠനം പൂര്‍ത്തിയാക്കി. 

ഖുതുബി മുഹമ്മദ് മുസ്‌ലിയാർ, ശൈഖുനാ ശംസുൽ ഉലമ ഇ.കെ അബൂബക്കർ മുസ്‌ലിയാർ, കോട്ടുമല അബൂബക്കർ മുസ്‌ലിയാർ, ഒ.കെ സൈനുദ്ധീൻ കുട്ടി മുസ്‌ലിയാർ, കെ.സി ജമാലുദ്ധീൻ മുസ്‌ലിയാർ, കാപ്പാട് ഇബ്രാഹിം മുസ്‌ലിയാർ, മുഹമ്മദ് കോയ തങ്ങൾ പരപ്പനങ്ങാടി, അബൂബക്കർ ഹസ്‌റത്ത്, കെ.പി അബ്ദുൽ അസീസ് മുസ്‌ലിയാർ, സുലൈമാൻ മുസ്‌ലിയാർ എന്നിവര്‍ ഉസ്താദുമാരാണ്. പാണക്കാട് സയ്യിദ് ഉമറലി ശിഹാബ് തങ്ങൾ, സയ്യിദ് അലി ബാഫഖി തങ്ങൾ, സി.കെ.എം സാദിഖ് മുസ്‌ലിയാർ, എ.കെ അബ്ദുറഹിമാൻ മുസ്‌ലിയാർ, ഇ സുലൈമാൻ മുസ്‌ലിയാർ എന്നിവര്‍ സഹപാഠികളാണ്. പാനൂർ, മട്ടന്നൂർ, ഇരിക്കൂര്‍, നിട്ടൂർ, വയലക്കണ്ടി തുടങ്ങി വിവിധ സ്ഥലങ്ങളിൽ ദര്‍സ് നടത്തിയിട്ടുണ്ട്. 

ഭാര്യ: പരേതയായ സി. ഫാത്തിമ ഹജ്ജുമ്മ. മക്കൾ: സഫിയ, സാജിത, മുഹമ്മദ് സഈദ് (ഖത്തർ), മുഹമ്മദ് സാദിഖ് (വ്യാപാരി), മുഹമ്മദ് സാലിം (ഖത്തർ). മരുമക്കൾ: ഇ.അബുറഹിമാൻ (കൂത്തുപറമ്പ്), നാസർ ഫൈസി (ഖത്തർ). സഹോദരങ്ങൾ: ടി.എസ് അബ്ദുൽ കാദർ മുസ്‌ലിയാർ, ടി.എസ് അബൂബക്കർ മുസ്‌ലിയാർ, ടി.എസ് അബ്ദുൽ ഹമീദ് മുസ്‌ലിയാർ, ടി.എസ് അബ്‌ദുറഹീം, റാബിയ (പയ്യോളി). ഖബറടക്കം ഇന്ന് രാത്രി 10 മണിക്ക്.