കോഴിക്കോട്:ജില്ലയിലെ അനധികൃത ട്യൂഷൻ കേന്ദ്രങ്ങള്‍ പൂട്ടാൻ ജില്ലാ കലക്ടർ അധ്യക്ഷനായ ജില്ലാതല ശിശു സംരക്ഷണ സമിതി യോഗം തീരുമാനിച്ചു. താമരശ്ശേരിയിലെ പത്താം ക്ലാസ് വിദ്യാർഥി ഷഹബാസ് കൊല്ലപ്പെട്ടതിനെത്തുടർന്നുണ്ടായ സംഭവ വികാസങ്ങളുെട പശ്ചാത്തലത്തില്‍ വിളിച്ചു ചേർത്ത യോഗത്തിലാണ് സുപ്രധാന തീരുമാനങ്ങള്‍ എടുത്തത്.
സ്കൂള്‍ ജാഗ്രത സമിതികള്‍ യോഗം ചേർന്ന് കുട്ടികള്‍ ഉള്‍പ്പെടുന്ന ലഹരി,അക്രമ വിഷയങ്ങള്‍ ചർച്ച ചെയ്യണം.കുട്ടികള്‍ നേരിടുന്ന പലതരത്തിലുള്ള പ്രശ്നങ്ങള്‍ 1098 എന്ന ചൈല്‍ഡ് ലൈൻ നമ്പർ വഴി അധികൃതരെ അറിയിക്കാം.ഇതിനായി 1098 എന്ന ചൈല്‍ഡ് ലൈൻ നമ്പറും ഏതൊക്കെ വിഷയങ്ങളില്‍ ചൈല്‍ഡ് ലൈനില്‍ വിളിക്കാമെന്നും അറിയിച്ചുള്ള വലിയ ബോർഡ് ജില്ലയിലെ എല്ലാ സർക്കാർ, എയിഡഡ്,അണ്‍ എയിഡഡ്,സ്വകാര്യ സ്കൂളുകളിലും അംഗീകൃത ട്യൂഷൻ കേന്ദ്രങ്ങളിലും പ്രദർശിപ്പിക്കണം.
എല്ലാ സ്കൂളുകളിലും കൗണ്‍സിലർമാരെ നിർബന്ധമായും നിയമിക്കണമെന്നും ജില്ലാ കലക്ടർ നിർദേശിച്ചു.1098 ചൈല്‍ഡ് ലൈൻ ബോർഡ് പ്രദർശിപ്പിക്കാത്ത സ്കൂളുകളിലെ പ്രധാനാധ്യാപകരുടെ പേരില്‍ നടപടിയെടുക്കും.ട്യൂഷൻ കേന്ദ്രങ്ങളില്‍ ഡിജെ പാർട്ടി പോലെ വലിയ ആഘോഷ പരിപാടി നടത്തുകയാണെങ്കില്‍ അക്കാര്യം പൊലീസ് സ്റ്റേഷനിലോ ഗ്രാമപഞ്ചായത്തിലോ അറിയിക്കണം.
സർക്കാർ-സ്വകാര്യ ഭേദമന്യേ എല്ലാ സ്കൂളുകളിലും ജാഗ്രത സമിതി യോഗം വിളിച്ചു ലഹരി, അക്രമ വിഷയങ്ങള്‍ ചർച്ച ചെയ്യാനും യോഗം നിർദേശിച്ചു.ജില്ലയിലെ സർക്കാർ,എയ്ഡഡ് പൊതു വിദ്യാലയങ്ങളും സ്വകാര്യ വിദ്യാലയങ്ങളും ഉള്‍പ്പെട്ട പൊതുവായ പ്ലാറ്റ്‌ഫോം രൂപീകരിക്കാനും യോഗം തീരുമാനിച്ചു.
Tags:
KOZHIKODE