ഓണ്‍ലൈന്‍ ട്രേഡിങിന്റെ പേരില്‍ കോടികളുടെ തട്ടിപ്പ്; കൊടുവള്ളി സ്വദേശിയടക്കം രണ്ട് പേർ അറസ്റ്റില്‍

കോഴിക്കോട്:ഓണ്‍ലൈന്‍ ട്രേഡിങിന്റെ പേരിലുള്ള രണ്ട് സൈബര്‍ തട്ടിപ്പ് കേസുകളില്‍ കൊടുവള്ളി , ചാത്തമംഗലം സ്വദേശികളായ  രണ്ട് യുവാക്കളെ ജില്ലാ ക്രൈംബ്രാഞ്ച് അറസ്റ്റ് ചെയ്തു.കരുവൻപൊയിൽ കൊടുവള്ളി മുനിസിപ്പൽ 18-ാം വാർഡിൽ പടിഞ്ഞാറെ തൊടിയിൽ വീട്ടിൽ മുഹമ്മദ് മിസ്ഫിർ (20), ചാത്തമംഗലം പഞ്ചായത്ത് മൂന്നാം വാർഡിൽ മുണ്ടോട്ട് പൊയിൽ വീട്ടിൽ ജാബിർ (19) എന്നിവരാണ് പിടിയിലായത്.

വെൺമണിയിലെ യുവാവിന് 1.3 കോടി നഷ്ടപ്പെട്ട സംഭവത്തിൽ വെൺമണി പോലിസ് സ്റ്റേഷനിൽ രജിസ്റ്റർ ചെയ്ത കേസിൽ തന്റെ മാതാവിന്റെ അക്കൗണ്ടിലൂടെ ലക്ഷങ്ങൾ പിൻവലിപ്പിച്ച് തട്ടിപ്പുകാർക്ക് കൈമാറിയതിന് ജാബിറും ,മാന്നാറിലെ മുതിർന്ന പൗരന് 2.67 കോടി രൂപ നഷ്‌ടപ്പെട്ട സംഭവത്തിൽ ആലപ്പുഴ സൈബർ പോലിസ് രജിസ്റ്റർ ചെയ്ത കേസിലാണ് മുഹമ്മദ് മിസ്ഫിറും പിടിയിലായത്.

ജില്ലാ ക്രൈംബ്രാഞ്ച് ഡി.വൈ എസ്.പി. എ.സുനിൽരാജിന്റെ നേതൃത്വത്തിൽ എസ്.ഐമാരായ അഗസ്റ്റിൻ വർഗീസ്, എ.സുധീർ, എ.എസ്.ഐ. ഹരികുമാർ, എസ്.സി.പി.ഒ. ബൈജു മോൻ, സി.പി.ഒ. നസീബ് എൻ. എന്നിവരടങ്ങുന്ന സംഘമാണ് കോഴിക്കോട് കൊടുവള്ളിയിൽ നിന്നും പ്രതികളെ അറസ്റ്റ് ചെയ്തത്. ജാബിറിനെ ചെങ്ങന്നൂർ ജ്യുഡിഷ്യൽ ഫസ്റ്റ്ക്ളാസ് മജിസ്ട്രേറ്റ് ഒന്നാം കോടതിയിലും മിസ്ഫിറിനെ ആലപ്പുഴ സി.ജെ.എം. കോടതിയിലും ഹാജരാക്കി. ഇരുവരെയും 14 ദിവസത്തേക്ക് റിമാൻഡ് ചെയ്തു.